春遊馬鞍山公園

5 APRIL 2011 (天晴)

今日清明節, 同露花無無聊聊去馬鞍山公園逛吓, 行吓同影吓!

影完公園, 到海濱旁影吓.

跟住我們去食甜品. 呢間甜品屋都開o左好幾年, 今次先係我們第一次幫襯. 估唔到, 又唔錯喎, 價錢仍都合理. 下次可以再去食過.

好有心的紫米豆腐花.

之後在屋企留下又影吓. 因為呢排日日見到呢幾棵樹的花開得好靚.

 

復活節, 食大餐

25 APRIL 2011 (天晴)

今日復活節的最後一天假期. 今年放四日, 我有兩日係屋企攤抖吓.

今日便是其中一天的出動日. 有咩搞, 梗係約好腳打台仔啦.

大家都好準時咁12:30pm到齊. 點知, 主人家Honey媽竟然唔係屋企, 真係十分之搞笑! 於是工人姐姐"亞端"先回來開門, 及幫手Set枱.

因為要罸吓Honey媽記錯時間, 所以由露花頂腳, 一頂便頂到北圈先俾番Honey媽打, 今日我們只打了八圈, 最終我一家輸HK$380, 而Honey媽今日是大贏家.

好難得, 今日7:00PM多便收局, 因為我們約好今晚到田下灣村的"三姐"食飯.

先前同網友1733去過兩次食飯, 但每次都係得4,5丁人, 未能食多一點. 所以今晚決定大棚人去食, 咁先可以試唔同的菜式.

鼓油雞半隻

瓦罉檸汁雞.

叫了兩個勁辣海鮮出前一丁. 正!

冰梅骨

雙子白肉卷. (不過今次少了蝦子)

蓮藕飄香

蒸石蚌

每次必食的魚蓉粥

今次好肥的脆皮牛腩.

鍋貼小塘菜

蛋白杏仁茶

我們仲叫了6個白飯. 呢餐大小15人, 每位大人HK$152. 好飽呀! 所以食o野都係大班人去好D, 可以食多D! 

21號的飯局

21 APRIL 2011 (天晴)

好o野! 明天起有一連四天的假期喇! 加上今日是21號 (因為我們我們拍拖的紀念日是6月21日, 以前每個月的21日都會出街食飯慶祝一吓!), 所以放工後, 有籍口同老公去味千食晚飯.

今次味千做緊呢個特價餐, 都幾抵食喎! 有沙律, 雞冀, 餃子, 兩碗拉麵同兩枝果汁.

嘩! 食得好飽呀! 於是我們去逛吓商場及影吓小露寶.

今晚仲有飯後小食. 呢期我個肥仔細佬放假便在家整小食或甜品. 而今日他便整了一些曲奇餅俾我同露花試.

D曲奇都唔錯, 幾好味! 仲有好多唔同的造型Tim!