日本東北之旅 (Day 5 - 5/2/08) 鶴の湯,角館 - 上集

日本東北之旅18天遊 (Day 5)

5 FEB 2008   鶴の湯(大雪) > 角館 (時晴時陰,有雪)  

今早未夠6:00am我便起床, 因整晚均睡得不好, 不知是否棉被較重還是溫泉浸得太多的關係 (這晚是旅程中的唯一一晚之失眠夜). 咁早, 2/F的洗手間應該無咩人, 於是我沒有去公共洗面台洗面刷牙, 真係唔守規. 之後叫醒埋ALICE同SHERY便一同去浸個晨早風呂.

一推開房間大樓的門, 已感受到外面的寒冷. 我們用最快的速度先行去黑湯, 浸了一陣後, 便即刻出去浸露天風呂. 露天風呂除了我們3人外, 真係一個人都沒有, 當然咁早又咁凍, 誰會似我們這麼傻! 在木架上放下我們的浴衣時, 發現我昨天晚上唔見了的扎頭丈巾, 經一晚的大風雪後竟然改變成了.....

由於露天風呂真的好凍, 加上開始落大雪, 我們於是用9秒9的時間來拍照後, 即撲往泉水去.  係咁大又咁靚的露天風呂的感覺真係十分之舒服, 開心!

8:00am早餐時間到嗱! 因為我同Alice去浸溫泉, 所以我倆好準時便到達了朝食事處, 我們等了15分鐘, 班團友還未到, 鶴之湯的人員來來回回好幾次問我可以開始食早飯未, 於是我便去房間找他們, 他們竟然還未起行, 真係激死! 唔該下次請大家準時一點吧!

食完早餐後, 執好晒行李, 預備坐11:00車. 於是我們又再開始拍照時間嗱!

今早真的十分大雪, 我們影吓相, 玩吓雪, 於11:00便坐酒店巴士走嗱!

感受 : 鶴之湯真係好靚, 希望下次有機會係秋天來睇紅葉La!

(消費總額) :

鶴の湯　：JPY9,663.33 (包括酒店1泊2食, 暖房附加費, 自貴蘋果及晚飯飲品)
----------------------------                                                                                                              合計       : JPY9,663.33                                                                                                        

 

日本東北之旅 (Day 4 - 4/2/08) 仙台,田沢湖,鶴の湯 - 下集

日本東北之旅18天遊 (Day 4)

4 FEB 2008   仙台(天陰) > 田沢湖(時晴時陰,有小雪) > 鶴の湯(時晴時陰,有雪)  

6:30pm終於有飯食嗱! 班男團友可以大刷一餐嗱! 由於我們有9個人, 所以酒店安排了一間大房間俾我們. 今餐的食物主要係鄉士料理, 即係秋田的地道色彩La. 當中的山の芋鍋尤其有名. (不過我們唔係好識欣賞, 只係覺得係一舊粉咁囉).

飲飽食醉後, 大家都要抖抖, 因為實在太飽, 不能馬上去浸湯. 於是又再一次發揮我們的愛影相本色, 連食事處的走廊都不停的影.

過了40分鐘左右吧, 我們4位女子便先回房取需要的物品去泡溫泉. 首先我們需在食事處對出的浴場沖身, 呢個所謂的浴場, 雖然場內都有一個ok的熱湯, 但最多只能容納4人 (因為只有4個花灑), 當我們開始沖身及洗頭時, 發現個水喉好唔掂, 勁慢, 勁細水, 絕對冇可能 用來洗頭. 於是我們決定唔洗頭住. 我們先去浸黑湯, 跟住過隔離的白湯, 之後才去浸露天風呂. 呢一個露天風呂都算係我浸過的風呂中最大的一個. 我們一邊浸一邊欣賞天上的星星, 當晚的星星很多很閃. 我記得對上一次睇好閃好多的星星是2002年係澳洲的袋鼠島.  浸露天風呂時, 我們商討到底好冇好試吓浸男女共浴的另一個露天風呂, 終於我同Alice決定去試試, 一場來到, 冇理由唔試吓o架, 加上個風呂鬼咁大煙, 而且女仔又可以包住毛巾出去的, 所以冇咩會被人睇到的. 浸左5分鐘左右, 真的見到男團友們,  幸好他們是有穿浴衣的, 如果唔係睇到D唔應該睇的部位就唔好啦, 話晒都係朋友ma.

浸完所有的風呂後, 我同Alice決定今次要去事務所大樓2/F的另一個浴場試吓個水喉ok唔ok, 好彩水力係掂o架, 我們終於可以舒舒服服咁洗頭嗱! 由於我們幾個女仔好想明早再浸多一次露天風呂及享受吓飄雪浸溫泉的感覺, 於是我們決定明早6:50am起身去浸一浸, 8:00am才食早餐.

小記一側 : 團友老李擔心6:30食晚飯後要捱到第二朝先有野食, 於是佢買多了2個芋來做宵夜, 當佢去浸溫泉時, 不停把個真空包裝的芋放入泉水整熱, 希望可以食的時候軟D同暖D, 咁都俾佢想到, 真係有夠攪鬼!

感受 : 鶴之湯真係一個名副其實的秘湯, 除了所在地夠深入外, 呢度無得上網不特止, 仲係收唔到電話, 加上電視都無一部. 真係使我們可以過一晚隱居的生活. 當然鶴之湯的景色真的十分靚. 而且亦都証實左乳頭溫泉有美人之湯的別名, 因為浸完之後皮膚真的好滑, 也沒有硬綁綁的感覺, 真的可以無需要搽cream.

 

日本東北之旅 (Day 4 - 4/2/08) 仙台,田沢湖,鶴の湯 - 中集

日本東北之旅18天遊 (Day 4)

4 FEB 2008   仙台(天陰) > 田沢湖(時晴時陰,有小雪) > 鶴の湯(時晴時陰,有雪)  

(下午 :  田沢湖站 12:10pm 羽後巴士 > アルパこまくさ 12:44pm >  鶴の湯 1:05pm到達)

12:00pm回到田沢湖車站, 2位大隻佬團友要跟車去取回行李(唔使5分鐘便回來了). 巴士一到, 知道今次大鑊嗱, 因為架巴士下面冇放行李喼的部份, 唯有把喼全搬上車. 我們由原先的排第一, 改為讓後面的乘客先上車. 之後辛苦各位大隻佬團友合作把9個大喼由車頭傳送到車尾, 仲要砌高D喼, 唔好阻路. 因為我們的搬運行動, 使班巴士遲了10分鐘才開走. (Sorry呀! 各位乘客. 因為日本的所有公共交通工具都是超準時的.)  坐低後大家只有同一個想法, 便是希望不要有任何乘客在中途上車或下車. 因為我們唔想再移動我們的行李喼.    

一到達鶴之湯, 男團友們要即刻起行去滑雪, 因為由酒店開出去田沢湖滑雪埸的巴士時間是1:15pm, 回程時間是3:50pm. 只有2.5小時, 猛男們滑開心D嗱!.

補充資料 : 後來老公話我知, 個田沢湖滑雪場都幾得, 而且仲收平左俾他們. 因為他們只玩得2小時多一點.

租滑雪具:JPY1500                                                                                                                                                                 上山吊椅卷: JPY1500  

 

之後我們女仕們便去事務室Check In, Check In時發現我本日本天書漏了在先前的田沢湖租車上, 於是請鶴之湯的姐姐仔幫忙致電俾租車公司, 請他們明天12:00係田沢湖車站等我取回本書. 真係麻煩晒嗱!如果唔見左本書, 都唔知去邊度搵好o野食.

由於3:00後才可有房間, 於是我們4名女子便先去茶室食Lunch. 茶室果然係茶室, 只有咖哩飯(JPY600)提供. 因為今天的天氣唔係咁好, 經常會下大雪, 所以我們最後決定都係唔坐車上去其餘五湯. (有機會希望可以係秋天時再去La) 於是我們便在茶室慢慢咁Hea, 影吓相, 睇吓外面的剷雪車剷雪. 就係咁, 唔覺唔覺過左3:00都唔知.

好o野! 可以去拿房了, 再踏入事務室時, 發現事務室的空間回復正常了(因原先的空間被我們的行李喼霸佔了), 原來鶴之湯的職員們已幫我們送去房間了. (我們真係要唔該晒他們, 因我們的行李又大又重, 而且房間仲係2/F,沒有電梯的.) 跟住, 有位叔叔帶我們逛了鶴之湯一周, 及詳細解釋那處是食飯的地方, 那處是洗手間, 洗面台, 浴場, 男風呂, 女風呂及混浴風呂等. (注:洗手間及洗面台是公用的)

之後才帶我們上房間, 一入到房間大樓, 真的感覺到鶴之湯的歷史悠久, 因大樓內的樓梯, 窗戶等都好有懷舊Feel. 當我們上到2/F, 睇見我們的行李一個一個已排放好在我們的房間門前, 真的再一次感受到日本人的待客之道係幾咁細心.

放好行李後, 我們係Shary房一邊睇相, 一邊嘆茶及食零食. 其間認識了一位好攪笑及傻傻地的日本妹, 她誤以為Tammy係男生, 仲同我講你男朋友好有型Wo.   當我們打算去浸露天風呂時, 男團友們正好滑完雪回來, 我們見天色仲有光, 且沒有下雪, 便襯黃昏前先去影一陣相. 影相前, 團友老李話好肚餓, 要先買D o野食充飢, 原來班友仔怕唔夠時間滑雪, 所以整個下午只係飲左一枝牛奶o乍. 以我們係鶴之湯蒲左一個下午的觀察, 唯一可以用來充飢的食物就係 ---- 鶴之湯名物之一的芋(JPY700), 由於700 Yen一個都唔平o架, 又唔知好唔好食, 加上距離食晚飯時間仲有40分鐘左右, 最後決定先買一個試吓先, 一齊係Hea室分甘同味, 唔知係o米因為一人食少少的關係, 呢舊名物又真係好好味Wo!

感受 : 鶴之湯真係名副其實秘湯, 係果度完全收唔到電話, 仲無電視tim. 可以買o野的地方只係得事務室內的一個Counter仔. 好有隱居Feel呀!

睇吓第一幅相的蘋果及最後張相的蘋果, 點解會得番1個, hehe因為我們買左6個, 仲要麻煩鶴之湯的職員幫忙係食晚飯時切俾我地作飯後果食Ma. 幾好辦法, 唔使自已批皮.

(下午消費總額) :

午餐：JPY600.00                                                                                                                         巴士：JPY580.00                                                                                     
蘋果 : JPY167.00 (6個/9份)                  
----------------------------                                                                                                              合計 : JPY1,347.00 (滑雪團友需加多JPY3,000)