鍾意旅行,鍾意熱鬧, 鍾意搞搞震 : 日本東北之旅 (Day 2

日本東北之旅18天遊 (Day 2)

2 FEB 2008 廣州(大雨) > 東京上野(天晴)

(早上 - 廣州 : ANA 9:15am機)

今朝一早5:50am起身, 3人輪流梳洗後時間已差不多了. 致電梅生才知外面落緊勁大雨. 又凍(6度)又大雨,難為梅生梅夫人要步行來酒店會合 . 見到咁大雨,真係慶幸我地昨天的決定坐酒店車去機埸, 否則又要擔遮又要推行李去坐機場巴士,真係超麻煩!

係酒店門口等梅生, 見到佢好醒咁將個喼用保鮮紙全包住, 好掂! (因後來發生一D事,發現真係要包好個喼架!)

6:45am開車,到機場都差唔多7:20am. ANA的check in counter完全冇人, 好快攪掂後去老麥陪梅太食個早餐後便要同佢say goodbye. 梅生同梅太要17日後先可再見嗱.

過關十分順利, 除Tammy稍為遲左一點外,因佢唔係用回鄉咭,加上個關員好似未見過回鄉簿咁. 班機應該係延遲左30分鐘吧, 因團友們上機即訓, 所以正確起飛時間不詳.

(下午 - 成田機場 : 到達時間 2:40pm)

落機過關也是十分順利, 唔知係咪國內機的關係, 過關時只有我們這班機的人, 唔駛點排隊. 記得之前每次過年坐UA到日本時都起碼要排30分鐘以上. 以為攞埋行李可以3:15pm前去starbucks出外跟其他香港出發的5位團友會合. 點知每件行李都發現有一點問題, 我個喼背部有一個大鞋印, Tammy個迷彩喼面有10數條刮花痕, 老公個喼最慘, 前part濕到入喼內, 所有藥物的包裝同條牛仔褲都濕晒, 條包邊又爆左，仲好奇怪咁有粉筆跡mark住個號碼, 梅生最少事, 只係喼底的膠座弄破了一點(因為佢先前包左保鮮膠). 由於我地今次用的係新喼, 加上係香港坐咁多次機都未發生過咁嘅問題, 於是我地決定去ANA counter用半桶水的日文投訴. 初時地勤空姐都say晒sorry, 用布來幫抺我老公個喼,但後來知道係廣州大雨關係便開始推卸責任及態度麻麻. 其實我地都唔預有咩賠償, 不過我地為左ANA的服務能夠改善( 尢其係廣州的ANA搬運工人), 於是我地堅持要見地勤的"部長", 要佢來睇睇d喼發生咩事及要佢report俾廣州知. (當然最後唔知佢有冇咁做.) 希望下次有機會再搭廣州ANA機時唔好再發生這種事La.(足足浪費左30分鐘來攪事.)

終於係3:40pm一行9人全集合好了. 我們決定坐3:50pm的京成線去上野.

(黃昏 - 上野)

今次係我第一次住上野的酒店 Suntargas Hotel, 因為18/2的機係早上9:50am, 加上無JR pass用. 於是決定係上野住,可以搭班次多及平宜一點的京成鐵路. 由於我基本上係池袋人, 所以今次係上野搵酒店都花左唔少時間(5:15pm到酒店).

Check in 入房後,發現Twin Bed房真係好細. 決定今晚回來後將16/2&17/2晚的房全改晒single & double bed room. 放低行李後, 第一件事係打電話去池袋間髮型屋Face 約6:30pm appointment剪頭髮及做color. 於是我們3個女仔便起程去池袋, 其他人去新宿睇鏡頭及相機.

一出酒店開始覺得係肚餓的時候了, 見到ampm便利店便首先買番個好耐無食的肉飽, 之後到上野JR駅, 見到間PUFF店又再買來食.

食食吓覺得我地都係要整張日本八達通 (SUICA咭). 方便D嘛, 因今晚我地最少都要坐3次JR, 唔駛次次買票, 正.

(晚上 - 池袋>上野>東京>上野)

去到池袋駅先醒起要check吓個JR換PASS的營業時間至幾點, 一問才知收6:00pm, 好彩駅長話東京那間收11:00pm. 於是sms俾老公叫9:00pm係東京等, 點知他覆我上野個間都係wo. 咁咪改番9:00pm係上野等la.

上到Face我同Alice做color及剪髮, Tammy齋剪. 初時問師傅, 我們要9:00pm到東京是否夠時間, 本來話唔得, 點知好快就攪掂晒.

剪完頭髮,即趕番去上野會合開pass. 點知原來有人收錯料, 所有JR換PASS的店全收6:00pm, 東京除外. 於是又要全班人坐山手線去東京換PASS及book3/2至6/2的車票. 因為無時間先食飯,唯有食住過雪糕夾心餅頂吓肚先. 當入JR閘時其他6位團友好羨慕我地3人有Suica. 於是等我開pass及book票時,他們全出去整番張有自己名的Suica玩吓.

差唔多11:00pm終於可以返回上野食晚飯(可能係宵夜才真), 飲酒的團友想去居酒屋, 但由於明天早車(7:42am)去仙台, 所以唯有分開食, 而我跟老公,梅生及剪髮姊妹便決定求其搵間食店. 係日本,真係求其搵間都好好食架! 係豬肉漢堡，有鐵板個餐係我架390yen, 老公個餐590yen,只係多左沙律.