日本東北之旅18天遊 (Day 15)
15 FEB 2008 (時雪時晴)
湯野上溫泉 12:19pm > 西若松 12:48 pm ([普通]会津鉄道会津線)
西若松 12:49pm > 會津若松 12:55pm ([普通]只見線) > 喜多方 1:27pm ([普通]磐越西線)
乘的士到湯野上溫泉剛好趕得上12:19pm的火車, 之後我們要在會津若松轉另一條線去喜多方. 到達喜多方站時看見四周都是2/16&2/17的喜多方祭り 的Poster. 當時我先醒起原來我一直以為我們是會星期六才到喜多方, 所以可以參與喜多方祭り, 而且還預約了2:00pm坐馬車Tim! Oh!慘!要即刻致電予馬車公司改時間先得.
好彩!車站有一個旅遊中心, 於是我請中心的嬸嬸幫忙打電話更改時間. OK!唔該晒!馬車會15分鐘內到車站接我們. 先前我們以為馬車站應該是在車站附近的. 原來唔係的! 當聽見馬車會來接我們時, 我們自己想像唔通架馬車咁型, 要在街上先逛一段路後便來到車站接我們. 哦!原來又錯了, 只是一輛Van仔來接我們去馬車站.
Van仔先車我們到藏屋買票及坐下來飲杯茶等待馬車. 我們當然唔會浪費等待的時候,所以係藏屋內不停地周圍拍照.
等了大約5分鍾左右, 終於請我們步出藏屋門外. 嘩!可以見到馬馬嗱!呢隻馬名叫"光太郎", 牠很靚仔o架, 又乾淨, 一D臭味都無o架! 唔信?俾相大家睇睇啦!
"光太郎"係o米好壯健及靚仔呀? 大家同太郎影完相, 溝通完後便可以上馬車嗱!
呢位係車伕伯伯.
OK!大家坐好要出發嗱!我,老公,Alice,四眼哥,Shery及Maggie坐上層, Tammy,老李,Kim Kim及Calvin坐下層. 初初坐的時候感覺好有趣, 後來越坐越覺得我們o係度虐畜咁!真係好對唔住光太郎呀!
上層
下層
原來馬車都係在馬路上行走的, 而且光太郎行得很慢, 所以我們令到後面有車龍呀!
同途人Say Hi!
光太郎行吓行吓,突然間停下來. 初時我們以為咁快已經到達下車點. 啊!好攪笑!原來係太郎要便便呀, 仲要車伕伯伯停車清理Tim.
全程40分鐘左右, 下車後我見伯伯要餵紅蘿蔔俾光太郎食, 於是我請伯伯俾一些我餵. 哈!光太郎食得好開心呀, 食完數個紅蘿蔔後仲唔夠, 當我們埋去同牠合照時, 牠不停的食我件外套, 唔知係o米我件外套鮮色, 牠當係紅蘿蔔來食呢?
這個馬車之旅, 大家都好開心, 亦有點不忍心! 因為實在太辛苦了光太郎嗱!唔該晒呀光太郎!
每包麵JPY105, 我,Alice同Tammy各人自製了一包, 有粗同幼的選擇o家!本來可以即場整來食, 但今天已收爐, 所以只好帶走吧!
跟住, 我同老公出外探路, 睇睇我們等陣要去的有名老麵舖 "まこと"之大概位置係邊. 點解我要揾這間店, 由於我本旅客書有介紹之外, 另一原因係我這幾天所遇到的日本人, 每當談及會去喜多方時, 大家都係話一定要到"まこと". 我同老公揾了約10分鐘左右, 又開始下大雪, 於是唯有急步返會拉麵館. 不過我地都大概知道了麵店的位置了.
等雪停了後, 我們便步行向第三站出發, 便是有200年歷史的釀酒倉庫, 名叫"大和川酒藏北方風土館"(免費入場). 沿途我們經過喜多方的部份藏之里, 步行街等地方.
終於來到"大和川酒藏北方風土館", 快D入去參觀吓先. 嘩, 仲有試飲Tim. 我選了杯較甜的白米酒來試試, 都幾好味Wo.
由於酒藏是於17:00關門的, 所以我們在這逗留了45分鐘左右便要離開了. 之後我們便向老麵店出發, 由酒藏步行去都要15分鐘左右的時間. 我們邊行邊向路人問路, 終於搵到了"まこと"嗱!可惜, 今天已經營業终了. 唉!明明本書及其他單章都係話收19:00o家?點解呀???好失望呀!
當時只係下午5:20分左右, 咁早便收舖, 真係十萬個不明白?? 無辨法啦, 由於天已經開始黑, 加上又開始下雪了, 又凍又餓, 點算呢?
唯有先去找的士公司吧, 之後團友們話不如返回會津才食東西. 但以我的性格, 來到喜多方無理由唔去食拉麵o家, 於是我係的士公司跟老闆娘說我們想去食拉麵, 但"まこと"關了門, 跟住老闆娘好好人咁介紹另一間麵店予我, 仲叫的士司機車埋我們去Tim. 所以最终大家可以一起去食番碗喜多方拉麵. 好o野!
呢間麵店叫"丸見食堂", 行前2條街便到JR站. 好方便! 仲好好食Tim. 真係多謝的士老闆娘的好介紹.
我們叫了9碗叉燒拉麵, 每碗JPY750.00; 而四眼哥因為太餓, 所以要食牛井.
全間店被我們10人霸佔晒. 再一次包店! 廚師開始整麵嗱, 睇睇先!
嘩!咁大舊叉燒!正呀!
吓, 原來仲要切條o家!好失望, 不過D叉燒都仲好厚.
我突然向老闆婆婆提意, 唔知可唔可以把我們3人先前係拉麵館自制的拉麵用店內的湯煮埋呢? 婆婆真係好好人呀, 真係答應我, 仲親自幫手Tim. 唔該晒呀!
呢碗就係用我們3人自家制的拉麵加埋老闆娘婆婆提供的免費湯底已成的拉麵. 而碗入面的叉燒係我自己加入去的. 團友食過後話D麵都OK. 咁JPY105o米好抵!
當我們付款時,發現呢部好有Feel的收銀機加算盤. 老闆伯伯話呢部機已經有60年歷史了.
大家终於食飽飽嗱!仲係好好味, 好抵食個隻, 所以決定今晚唔洗再食o野了. 我們坐6:34pm的火車返會津. 去到唔知邊個站後, 有一班中學生上了火車, 其中有2位樣子得得地的學生哥坐我們對面, 見佢地不時望我們, 於是我忍唔住向他們搭訕, 問他們昨天情人節各人收了多少份朱古力. 嘩!每人都有10多份Wo. 唔怪得他們附近的學生妹係咁對住他們笑啦!
返到酒店後放低行裝後, 我同Alice,Tammy再一次指定動作的去行百貨公司. 之後8:00pm約左老公到酒店1/F的卡拉OK Box唱K. 呢個真係真真正正的BOX, 於酒店1/F, 大堂有小賣店, 1張桌球枱, 4間卡拉OK房. 收費每人JPY400可唱1小時, 我們4人即共收JPY1600, 如需飲o野或食o野, 可自行出小賣部買. 價錢同便利店的差不多.
初時我們諗住咁平o米去唱吓K啦, 一定唔方多廣東歌. 嘩!點知唔係Wo, 都有唔少的廣東歌, 仲係OK新o果隻. 而且仲好電腦化, 最攪笑係小賣店仲有搖鼓, 叮叮等樂器借. 可惜只玩得1小時, 因為我們要去浸溫泉呀. (唔好意思, 掛住玩及拍VIDEO, 唔記得影相.)
今晚係在會津的最後一晚, 無理由唔去試吓o個免費溫泉o架! 所以今晚決定同Alice去睇睇. 最麻煩係呢間富士溫泉係在酒店的後面, 所以一定要穿著全套保暖的衣服及鞋襪出去. 而且會津晚晚都落大雪Tim.
入到"富士之湯"後, 感覺好似去左深圳的SPA場咁, 當然整潔好多. 女湯內共有8個以上的湯及一個半露天的湯, 真係估唔到咁有規模. 大堂外也有很多的按摩椅, 而且2/F仲有得剪頭髮Tim.
(消費總額) :
酒店 : JPY 9,800.00 (2人) 馬車 : JPY 2,000.00 (2人) 晚餐 : JPY 1,500.00 (2人) Taxi : JPY 800.00 (2人) 卡拉OK : JPY 800.00 (2人) 自制拉麵 : JPY 105.00 (1人) 合計 : JPY 15,005.00 (2人)
上一篇 : 日本東北之旅 (Day 15 - 15/2/08) 會津若松, 大內宿, 喜多方 – 上篇
下一篇 : 日本東北之旅 (Day 16 - 16/2/08) 會津若松, 輕井澤,上野
沒有留言:
張貼留言