單車意外

21 OCT 2011

今晚照常食完飯出車, 今次仲專登踩到去科學園試吓我班12月於此搞的Event的路徑, 
一齊都好順利, 直至回程時, 口痕話想去食糖水, 就係咁出事喇!

當我落隧道的斜路時, 唔知點解按唔多brake, 我自炒到露花的車尾, 隨即墮地. 起身時,
露花話你塊面流血, 即幫我檢查, 雖然無流鼻血, 但塊面都流幾多血, 於是決定要去急症室.
但當時兩部車又唔知點喎, 我好冷靜咁同露花講, 不如我自己先坐的士去急症室, 露花推番
兩部車返屋企.

我坐上的士時, 一直都唔敢拎塊鏡出來睇, 只感到我個嘴好腫. 直至掛完號, 到分流處坐低後, 
才拿鏡照照. 嘩! 鼻樑, 左鼻邊, 人中位都傷o左, 上嘴唇腫晒, 好驚毀容呀! 嗚.....

到我喇! 係呢果時候, 露花剛剛到. 他個樣仲驚過我, 我知o既, 因為他唔可以第一時間陪我去醫院,
所以他一路都好擔心我的情況. 露花, 我知你對我好好ga!

護士先幫我打o左枝破傷風針, 之後係咁抹吓我塊面, 照吓我d牙. 之後再出大堂等.

等呀等! 等了差唔多一粒鐘, 之後見我d傷口都穩定, 又無頭痛, 於是決定轉去大圍的24小時診所
睇醫生 (唔知點解當時醒唔起去仁安醫院), 洗傷口, 拎o左5日的抗生素, 消炎, 消腫同止痛藥後便
回家.

所以我今個星期請o左病假, 在家休養, 我個嘴於星期二開始退腫, 明天會再去仁安覆診.

我下次踩單車會小心注意安全, 多謝大家關心.