愛犬在世的最後1天 - 3.6.2010

3 JUNE 2010 (下雨)

BB瞓到早上5點多, 開始有聲, 唔知係咪要去wewe呢? 所以我同露花即時起身幫牠wewe, 搞掂後, 牠仍是心緒不寧, 好無心機咁係度嗚嗚叫, 因為記得醫生話BB雙眼已經唔多睇到,可能牠怕黑吧, 於是我抱牠出廳一起瞓.

7:15AM左右我要起身喇, 因為我要陪老爸及老媽一起去醫院, 而BB會由露花照顧.

今日老媽的白內障手術好順利. 我們一起回家食午飯, 之後爸媽到我家睇BB, 本來爸媽話要帶亞Be走, 但我堅持要BB留底, 一來我想陪BB耐D, 二來要老媽好好休息.

爸媽離開後, BB不停地在吠, 平時BB好少會咁o架! 我同露花都唔知BB想點, 每當牠吠的時候, 我都會用條狗繩扶起牠, 睇吓牠係味想去wewe, 每次牠一可以企定後, 便會不停地在行來行去, 好似呢段片咁Lor!

http://www.youtube.com/watch?v=rkQWy8MMNSo

行完, 牠又會靜一陣.

4點多後, 我同露花講, 不如帶BB去睇吓蔡醫生, 因為BB真係從來未試過咁樣吠法的, 我懷疑牠會唔會是痾唔出大大呢, 自牠出院後整整一星期, 牠好似只做過一次大事(果次真係好大堆頭Tim!) 加上明天我要返工, BB今晚要返回老爸老媽度, 如BB今晚繼續咁吠, 會影響老媽的休息.

5點多左右, 我們同BB到達診所, 可惜今日蔡醫生放假, 於是睇傅醫生. 醫生話牠好似無咩事oY, 個肚仔都唔太脹, 無需要放便便, 可能對眼睇唔到, 無安全感啦.

於是我提議醫生可唔可以幫BB打D鎮靜劑, 咁牠可以休息多一D, 不過醫生唔讚成, 怕影響BB現在的病情, 最後我們只配了支眼藥水, 因為BB對眼好多眼膠, 我怕牠會發炎.

今晚肥仔細佬收早, 所以我們便約了7:30pm在樓下的酒家食晚飯. 晚飯前, 我先湊番BB回老爸老媽家.  

老爸食飽後, 連糖水都唔食, 便話要早一點回家陪BB. 而我們亦都於8:30PM回家睇BB. 一入門口, 便見老爸用狗繩拖住BB在兜圈, 老爸仲話BB剛剛wewe完. 而且BB也無再吠喇! 一齊都睇似正常咁!

於是我便開始餵BB食Baby Food, 牠都食o左半瓶o架.

正當露花打算再開瓶新Baby Food時, BB無端端嘔吐, 之後更開始抽筋.

露花第一時間用上星前蔡醫生俾我們預用的兩枝針(內附有藥的)插入BB的肛門度, 而我也即打俾蔡醫生(可惜打好幾次都是留言), 肥仔細佬, 老爸老媽全在BB旁邊不停地叫住"BB!BB!BB!".

睇住BB不停的抽縮, 且插了這兩枝藥也無見收效. 我們都感覺到BB將會離開我們, 牠在呢一個星期已經撐得好叻, 醫生認為完全唔得的, 牠都做得到俾我們睇, 好似行路咁啦!

所以我同露花一邊摸住BB, 一邊同牠講 "BB, 你好叻女呀! 大家都知你好叻, 今日全家人都係度, 有老爸, 有老媽, 有肥仔, 仲有我同露花呀, 知道你要全家人齊整 , 上個星期哥哥(即我大細佬)都有特登返來睇你, 知道你要知老媽對眼無事, 手術成功, 你先安心. 好喇! 我們全都在, 你唔好撐喇! 你要舒舒服服咁走呀, 你可以安心走喇!" 

我們一講完, BB的呼吸即刻停頓了. 感覺BB真係好有性! 呢段時間雖然不足30分鐘, 但對於我們來講好漫長, 因為要睇住自己心愛的家人離開.

好多謝BB陪我們渡過了十六個歲月, 俾o左好多難忘的回憶我們一家人.

我們會永遠懷念你, 你的所有所有全在我心中, 好似第一與你的見面, 第一次帶你坐車去打防疫針, 第一次帶你走鬼...... 好多好多的第一次!

之後我即打電話俾同事Kennis先前介紹的寵物善終服務Petsfuneral的亞Paul, 他咁啱在附近, 所以好快便來接走了BB.

係度, 亦都要再一次唔該晒亞Paul的幫手, 他安排BB的後事, 安排得好好!

BB一路好走!