2009日本之旅17天遊 (Day 10)
31 JAN 2009 (寒冷下雪)
By 客席寫手: 露花
話說睇完班亞"蟬"表演揉湯之後，四位男仕已經成身痕哂，滑雪癮發作，o係湯再影陣相之後，立即連跑帶跳咁番去Pension，一見倒厚生先生，就二話不說咁跳o左上佢部坐架 (梗係啦，四條蛋散冇個識日文，邊會有o野講.......
一路上，個心硬係唔係好老"黎"，皆因個天一直都落緊雨粉，部車一路上山，D雨都係冇停過，心諗從來都未試過落住雨泥滑雪，但並唔係未試過就想貪新鮮家嘛，小弟件滑雪裝並唔係咩Gore-Tex，老實講真係怕會入水
10分鐘後，厚生先生停車啦，但原來仲未到滑雪場，佢先帶我o地去一間租雪具o既鋪頭攪掂D"架生"先，一入到去，就見倒兩個以慢鏡重播咁款o既亞伯泥招呼我o地，我梗係即刻用我"流利"o既日文同佢o地講: 四個人，全套，4個鐘!! (講到好似去o左架部咁
出門口o個陣厚生先生指一指雪具舖架車，佢話認住呢架車，一陣就係佢泥收番D雪具，4個鐘後o係滑雪場門口等。然後我o地就攬住D雪具再上厚生先生架車去滑雪場，5分鐘之後終於到啦，而最驚喜o既係，一直冇停過o既雨粉，上到泥竟然變o左雪粉，正!!
告別厚生先生後，拿拿聲走去買Lift pass，盛惠2,000大￥(因為又有割引卷)，記憶中除o左舊年去田湖之外，呢度都算係最平
原價料金
呢個滑雪場有一條比賽用o既跳遠高台，相信厚生先生o係度都留低過唔少腳毛
第一時間就睇中條長3公里o既林間道しやくなげコース，屬於初級，諗住搵佢泥熱身，走到上去起點，發覺呢度亦係上白根山睇火山湖o既Ropeway登車站 (就係樓下呢幅相)，因為一來唔知我o地張pass包唔包Ropeway
呢條林間道真係唔講得笑，又平又少彎，平橇擺兩擺就停埋o係度都有之，所以要一路札住個馬，小A字咁一直到山腳，真係悶到嘔又到爆
飽餐之後，轉攻中級雪道御成山ゲレンデ，雪道夠闊，平均斜度都唔係太斜，亦唔會無端端有一段會斜到撻瓜你，都幾好玩
玩o左兩轉見倒老婆佢o地同班o靚玩雪兜，就走埋去八o左陣，然後梗係擒擒青又上番山啦，跟住亞君有個開心大發現，就係有個兩段跳o既小跳台，其實跳台唔算太高，但第二段o個個都有成5-6呎高，以我o地從來橇不離地o既造旨泥講，已經係一個大挑戰，儉儉首先扯白旗
不過最堅係亞君Last一跳
厚生先生話呢對咁幼o既撬係跳台用o家!
開心o既時間過得特別快，又到走o既時候啦，我o地走番去滑雪場門口，等o左一陣雪具舖架車就到o勒，伯伯一落車就o係車尾箱摞番D鞋俾我o地，等我o地換完後佢好沉默咁收番o西D雪具走o左，伯伯好Cool
跟住就番去滑雪場join番老婆佢o地，再hea多陣就一齊等厚生先生接我o地番Pension食晚飯，雖然滑完雪好，但個心已經好期待過多幾日重到白馬Green Plaza，可以再勁滑多兩日
(消費總額) :
| Lunch | : | JPY 850.00 (1人) |
| Rental | : | JPY 2,500.00 (1人) |
| Pass | : | JPY 2,000.00 (1人) |
| 合計 | : | JPY 5,350.00 (1人) |
上一篇 : 日本合家歡之旅 - (Day10-31/1/09) - 草津溫泉, 草津國際滑雪場
下一篇 : 日本合家歡之旅 - (Day11 - 1/2/09) 草津溫泉, 輕井沢 - 上篇
沒有留言:
張貼留言