做唔做手術?

21 APRIL 2009   (天晴)

認識我的老朋友, 都會知道我有甲狀腺發炎的問題. 我呢個病由我8歲便開始跟住我,  且於16歲便在威爾斯睇醫生. 一直以來, 每每覆診醫生都話無咩事oY, 咁後生唔駛做手術!

初時我是需要食甲狀腺藥來提高番我的甲狀腺素. 都唔記得食o左幾多年o拿. 後來我的甲狀腺素正常, 不用再食藥. 講真呢個病對於我來說, 除o左條頸大了些少外, 其他一般甲狀腺的病徵都無發生過, 例如, 常心跳, 手震, 突肥突瘦等.....等. 所以我唔覺得有咩特別的問題. 

不過又唔記得由幾時開始我右邊甲狀腺位多了一粒2cm多的瘤仔, 20多歲時照超聲波"篤針"抽細胞出來驗時都話無問題. 後來因為威爾斯的專科實在太busy o拿, 呢個專科改再去"大埔那打素醫院"2年吧, 跟住又改去"北區醫院".

自從於"北區醫院"覆診後, 每次果度的醫生都會提議你做手術. 因為我對他們無信心, 所以每次都話唔考慮做手術.

直至上年年初, 我再到"北區醫院"覆診時遇見一位睇似好有經驗的醫生, 經他詳細解釋後, 知道我2007年的超聲波報告顯示果粒瘤仔的細胞有一點唔正常, 由於現在的食物都會有好多的刺激素同化學o野, 加上年紀的增長, 無人可以肯定果粒瘤唔會變質, 提議我唔好帶住個計是炸彈係身. 最終我便決定排期做手術. 且日子定於今年9月中.

當我決定要做手術後, 同一日我即刻付款俾醫院, 向醫院取回部份update的化驗報告. 因我打算會揾多一位私家醫生的專業意見. (由於我從小便有呢個病, 所以保險的醫療是唔Cover的!)  收到寄來的報告後, 我致電給我另兩位護士好朋友資詢吓, 她們均說盡量唔要係北區醫院做手術

, 如可以最好去瑪麗做啦! 吓!點先可以去瑪麗呀?

於是Windy提議我用她西環屋企的地址來做登記, 最後我致電北區醫院話要搬離新界區, 所以要取消手術安排.  且於2月尾再覆診時, 更改了我的住址及取醫生信改為到瑪麗醫院覆診.  

今日係我第一次到瑪麗醫院覆診, 初是以為點都要係度睇番一年半載先有時間排期做手術啦. 點知醫生竟然可安排我31/8入東華醫院做手術! 醫生仲話會幫我切晒整個甲狀腺wor (先前北區醫院只係安排做右邊的) , 因為他話我左邊都有發炎的情況, 如只做右邊, 我都有50%係要長期服藥的. 為免日後有機會再做一次左邊, 所以見議做埋左邊. 吓! 無晒整個甲狀腺功能, 有無問題o家? 我o米要成世食藥Lor! 真係有d唔知點算??

等我呢排又去問吓D專業人仕的意見先!